اكتشفوا أني بنت لحظة بس أعدل برقعي

عيد · 10-11-2007, 09:34 PM

الحقيقة أنا عمري ما نشقت لي صفحة اللهم لك الحمد طول عمري أليف مع إدارة الرقابة لكن شكل هالمقالة بتنشق لما فيها من عك وعجن «وربي ما عندي ما عند أمي ساره بس كذا أبغى أشغل موظف الرقابة وأخليه يقرا مقالتي خمس مرات والسادسة عن الشكة» المهم أنا وصلني علم من كثير من القراء يقولون انهم اكتشفوا أني بنت «لحظة بس أعدل برقعي» واني صديقة طلال الرشيد (( والله لو صحيح انا صديقة طلال الرشيد كان اكتشفت ان طلال الرشيد يوم يوزعون الذوق في الرياض هو في القصيم يتسوق )) واني اصلا شاعره معروفه (( شاعره بدوخه )) واني احتمال كبير اكون نجاح المساعيد ((فال الله ولا فالكم ))المهم أن الموضوع شدني بالحيل حسبي الله عليهم لي أربع سنين أكرف من هالمقالات وأشق وأخيط فيذا الخلق واتبهدل ذيك البهدلة في بنشر السيارة كل شهر عشان أوصل مقالتي وآخر شيء أطلع بنت حلال؟! ياللي ما تخوفون الله؟! «لحظة طاح مني قلم الروج » عموماً بما أنكم اكتشفتو هالسر اللي جالسة أربع سنين محافظة عليه «أموت في هاء التأنيث كني جالسة على كنب طويل ومادة رجلي وحاطه رجل فوق رجل والسيقااار على طرف فمي من البرستيج اللي أنا غرقانه فيه» يا شين التنوره لاصارت ضيقه وانتي جالسه تكتبين المهم بعطي بنات جنسي بعض النصايح دامهم يسمعون من أختهم رفيعة الشان وطبعاً النصايح راح تخص البشره والجمال والرجيم. 1 - أول شيء بخصوص البشرة وعملية التسمير طبعاً انتو عارفين حنا يا البنات نحب نسوي تسمير من كثر ما البياض اللي شاق وجهنا وصايرين كن حنا ورق أبو ريال حق الطباعة من زود البياض المهم تجيبون بيض حمام أسود وتكسرونه على جباهكم بقوة وحاولوا يكون البيض توه مبيوض عشان يكون قاسي على الجبهة ولا شفتو الصعارير كثرت ولا به فود هذا ديانا وهذي بياضها روحو جيبوا صور نادي منتخب «اتحاد» الكاميرون وحطو صور اللاعبين على خششكم وتمشو تحت الشمس لين تسيح الصورة وتسمر وجيهكم اسئلو مجربه. أما بخصوص التبييض وأخص الأخوات السمرات يروحون أقرب صيدلية ويطلبون أسمنت أبيض خاص بالجبس ويصبغون فيه وجيهم ثلاث مرات وعقبة يغطسون وجيهم بمويه بااااارده مره وعقبه يطلعون على السطح الساعة 2 الظهر لين يجف الاسمنت وعقبه ينزلون تحت المكيف ربع ساعة وعقبه ترش عليه مثبت شعر ولا تنسي تفتحي فتحات لمناسم الهوا يمكن المسألة تاخذ لها كم أسبوع المهم في النهاية تجيب مطرقة وتكسر في وجهها وعقبه أنصحها ما تناظر في المراية إلا ومعها أحد يمسكها لا طاحت من الفرح هذي انا ما جربتها طبعا لني بيضااااا بس صاحبتي مجربتها صحيح لي سنتين من عقبها ماشفتها بس اكيد الغايب حجته معه الحين اكتفيت هالقدر من النصايح لضيق الصفحة والعدد الجاي إن شالله بكمل باقي الإرشادات والحين أسترخصكم رايحه للمشغل صالون الرجل الانيق أحلق اللحية وأخفف من الشارب. رفيع الشان

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحث المتقدم
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
لحظة اعتررررررراف	زهرة الصباح	المنـتديـات الأدبـية	2	10-18-2007 01:06 PM
التيــــــــــــــما 2007 معدل	نـايــNaifـف	منتدى الرياضة والسيارات	11	05-06-2007 02:04 PM
( بعد 1400 سنه اكتشفوا الحكمة من تحريم النمص)	سلطانووووه	المنتدى الاسلامي	7	05-05-2007 03:39 AM
لحظة صمت	عبدالرحمن جمال	المنـتديـات الأدبـية	1	05-01-2007 01:17 PM
مصطلحات علميه من معجم العربجه والعربده من علم السلتحه	مشتاق لك	منتــــدى الصــرقعــه والـهــبـال	3	11-30-2004 12:35 AM

الذين يشاهدون محتوى الموضوع الآن : 1 ( الأعضاء 0 والزوار 1)

اكتشفوا أني بنت لحظة بس أعدل برقعي

منــتـدى الـقــصـص والـغـرائــب